تمپ کے علاقے گومازی میں آج علی الصبح تقریباً چار بجے پاکستانی فوج کے ایک قافلے پر مسلح افراد نے شدید حملہ کیا۔ علاقائی ذرائع کے مطابق حملہ آور قافلے کے راستے میں انتہائی قریب سے مورچہ زن تھے، اور جیسے ہی قافلہ مذکورہ مقام پر پہنچا، اس پر شدید فائرنگ شروع کر دی گئی۔
ذرائع کا کہنا ہے کہ حملے میں قافلے میں شامل چھ گاڑیوں کو نشانہ بنایا گیا، جس کے نتیجے میں متعدد ہلاکتوں کی اطلاعات موصول ہوئی ہیں۔ اس کے علاوہ پاکستانی فوج کی دو گاڑیوں کے ناکارہ ہونے کی بھی اطلاعات ہیں، تاہم ہلاکتوں اور زخمیوں کی تعداد سے متعلق سرکاری سطح پر تاحال تصدیق نہیں ہو سکی۔
واضح رہے کہ بلوچستان کے مختلف علاقوں میں حالیہ عرصے کے دوران پاکستانی فوج کو متعدد حملوں کا سامنا رہا ہے، جن میں جانی نقصانات کی اطلاعات سامنے آتی رہی ہیں۔
ماضی میں ایسے کئی حملوں کی ذمہ داری بلوچستان لبریشن فرنٹ قبول کرتی رہی ہے، تاہم گومازی میں ہونے والے اس تازہ حملے کی ذمہ داری تاحال کسی تنظیم نے قبول نہیں کی۔
