بلوچستان کے علاقے بلیدہ میں نامعلوم مسلح افراد کی فائرنگ سے ایک شخص زخمی ہوگیا جبکہ کراچی سے پنجگور کے تین رہائشی نوجوانوں کے جبری لاپتہ ہونے کی اطلاعات ملی ہیں۔
تفصیلات کے مطابق بلیدہ کے علاقے میناز میں آج موٹر سائیکل پر سوار نامعلوم حملہ آوروں نے فائرنگ کر کے محمد امین ولد شعیب کو نشانہ بنایا۔ جس کے نتیجے میں وہ زخمی ہوگئے۔ زخمی کو فوری طور پر طبی امداد کے لیے ہسپتال منتقل کر دیا گیا۔
ذرائع کے مطابق محمد امین اس وقت اپنے کھیتوں کی طرف جا رہے تھے جب ان پر حملہ کیا گیا۔ فائرنگ کی وجوہات تاحال سامنے نہیں آ سکیں۔
دوسری جانب اطلاعات کے مطابق پنجگور کے علاقے پروم کے تین رہائشی، صابر ولد فضل کریم، زبیر ولد فضل کریم اور سلمان ولد شاہی کو کراچی سے پاکستانی فورسز نے حراست میں لینے کے بعد لاپتہ کر دیا۔
ذرائع کا کہنا ہے کہ یہ نوجوان علاج کی غرض سے کراچی آئے تھے اور 9 اگست کو ایک ہوٹل سے اسپتال جاتے ہوئے حراست میں لیے گئے، جس کے بعد ان کا کوئی پتہ نہیں چل سکا۔
