ایران کے سرکاری میڈیا کے مطابق اسرائیل نے ایک بار پھر نطنز میں واقع ایران کے زیرِ زمین یورینیم افزودگی کے مرکز کو فضائی حملے کا نشانہ بنایا ہے۔ ایران کی ایٹمی توانائی تنظیم کے مطابق اس حملے کے نتیجے میں زیادہ تر نقصان زمین کی سطح پر ہوا ہے، جبکہ زیرِ زمین سینٹری فیوجز محفوظ رہے۔
تنظیم کے ترجمان بہروز کمالوندی نے کہا ہے کہ “زیادہ تر نقصان زمین کی سطح پر ہوا ہے، اور یورینیم افزودگی کے لیے استعمال ہونے والے زیرِ زمین سینٹری فیوجز کو کوئی جانی نقصان نہیں پہنچا۔”
ادھر ایرانی میڈیا نے اطلاع دی ہے کہ اسرائیل کی تازہ کارروائی میں صوبہ مشرقی آذربائیجان میں واقع تبریز ایئرپورٹ کو بھی نشانہ بنایا گیا، جہاں حملے کے بعد آگ بھڑک اٹھی۔ مہر نیوز ایجنسی کی جانب سے جاری کی گئی ایک ویڈیو میں دیکھا جا سکتا ہے کہ ایئرپورٹ سے آگ اور دھوئیں کے بادل اٹھ رہے ہیں۔
یہ حملے ایسے وقت میں سامنے آئے ہیں جب ایران اور اسرائیل کے درمیان کشیدگی میں مسلسل اضافہ ہو رہا ہے، اور خطے میں سیکیورٹی کی صورتحال مزید نازک ہوتی جا رہی ہے۔
