بلوچستان کے دارالحکومت کوئٹہ میں اتوار کی شب ایک بم دھماکے میں کم از کم ایک شخص ہلاک اور چار زخمی ہو گئے۔ واقعہ مغربی بائی پاس کے ساتھ بروری روڈ کے آخری سٹاپ پر پیش آیا۔
ایس ایچ او بروری تھانہ محمود خروٹی کے مطابق دھماکے سے ایک ہنڈا سوک کار متاثر ہوئی۔ گاڑی میں سوار ایک شخص موقع پر ہلاک جبکہ دوسرا زخمی ہوا، اس کے علاوہ تین راہگیر بھی زخمی ہوئے۔
پولیس کے ایک اہلکار نے نام ظاہر نہ کرنے کی شرط پر بتایا ہے کہ دھماکہ مقناطیسی بم کے ذریعے کیا گیا تھا، جو گاڑی کی ڈرائیور سائیڈ پر نصب کیا گیا تھا۔ ہلاک شخص کی شناخت بابل محمد حسنی کے نام سے ہوئی جو قلات سے تعلق رکھتے تھے، جبکہ زخمی شخص نبیل ان کے ساتھ گاڑی میں موجود تھا۔
یہ دھماکہ گزشتہ 24 گھنٹوں کے دوران کوئٹہ میں ہونے والا دوسرا واقعہ ہے۔ ایک روز قبل ہنہ کے علاقے کلی منگلا میں بم دھماکے میں دو افراد ہلاک اور سات زخمی ہوئے تھے۔
تاہم دونوں حملوں کی ذمہ داریاں تاحال کسی تنظیم نے قبول نہیں کی ہیں۔
