ایران کے جنوبی شہر بندر عباس کی شاہد رجائی بندرگاہ پر زوردار دھماکے اور آگ لگنے کے نتیجے میں کم از کم 516 افراد زخمی ہو گئے۔
ایرانی میڈیا کے مطابق دھماکہ آج دوپہر کے وقت بندرگاہ کے سینا کنٹینر یارڈ میں ہوا، جہاں متعدد کنٹینرز میں مبینہ طور پر خطرناک مواد یا کیمیکلز موجود تھے۔ دھماکے کے بعد ایک بڑی آگ بھڑک اٹھی اور سیاہ دھوئیں کے بادل کئی کلومیٹر دور تک دیکھے گئے۔
دھماکے کی شدت سے قریبی عمارتوں کے شیشے ٹوٹ گئے جبکہ ایک عمارت مکمل طور پر منہدم ہو گئی۔
ابتدائی اطلاعات کے مطابق 281 افراد کے زخمی ہونے کی تصدیق ہوئی تھی، تاہم بعد میں زخمیوں کی تعداد بڑھ کر 406 اور پھر 516 تک پہنچ گئی۔
دھماکے کے فوری بعد امدادی کارروائیاں شروع کر دی گئیں۔ ہرمزگان ریڈ کریسنٹ سوسائٹی سمیت ہنگامی سروسز نے موقع پر پہنچ کر زخمیوں کو قریبی اسپتالوں میں منتقل کیا اور آگ پر قابو پانے کی کوششیں کیں۔
دھماکے کی وجوہات معلوم کرنے کے لیے تحقیقات جاری ہیں۔
