ضلع آواران کے علاقے کولواہ میں پاکستانی فوج نے ایک اور نوجوان کو حراست میں لینے کے بعد قتل کر کے لاش پھینک دی۔
ذرائع کے مطابق قتل کیے گئے نوجوان کی شناخت غوث بخش ولد ماسٹر الٰہی بخش کے نام سے ہوئی ہے جو مالار کا رہائشی تھا۔ غوث بخش کو گزشتہ روز فورسز نے کیمپ بلا کر حراست میں لیا اور آج صبح انہیں وہلی ڈال میں قتل کر کے لاش پھینک دی گئی۔
واضح رہے کہ پانچ روز قبل پاکستانی فورسز نے کولواہ گشانک میں ساجد ولد مستری ناصر کو حراست میں لیا تھا، جنہیں دو دن بعد قتل کر کے ان کی لاش مالار چیل میں پھینک دی گئی۔
اس سے قبل ایک ہفتہ پہلے کولواہ کے علاقے ملار بنگ بازار میں پاکستانی فوج نے ایک لیویز اہلکار یونس ولد رسول بخش کو حراست میں لینے کے بعد اگلے دن قتل کر دیا۔ بعد ازاں انہیں بی ایل ایف سرمچار ظاہر کرنے کی کوشش کی گئی تاہم بی ایل ایف نے ان دعوؤں کو سختی سے مسترد کر دیا۔
دو دن میں کولواہ میں پاکستانی فوج کے ہاتھوں حراست کے بعد قتل ہونے والوں کا یہ تیسرا واقعہ ہے۔
