دکی کے قریب واقع ایک مقامی کوئلہ کان میں زہریلی گیس بھر جانے کے باعث دم گھٹنے سے ایک کانکن ہلاک ہوگیا۔
اطلاعات کے مطابق دکی سے تقریباً 8 کلومیٹر مغرب کی جانب واقع کوئلہ کان میں دورانِ کانکنی اچانک زہریلی گیس بھر گئی، جس کے نتیجے میں کانکن عبدالرشید ولد عبدالغفور قوم اچکزئی، سکنہ افغانستان، موقع پر ہی ہلاک ہوگیا۔
واقعے کے بعد مقامی کانکنوں نے اپنی مدد آپ کے تحت لاش کان سے نکال کر ہسپتال منتقل کی، جہاں ضروری قانونی کارروائی مکمل کرنے کے بعد میت ورثا کے حوالے کردی گئی۔ بعد ازاں لاش کو افغانستان روانہ کردیا گیا۔
واضح رہے کہ بلوچستان میں کانکنی سے منسلک حادثات کے واقعات نئے نہیں۔ پاکستان سینٹرل مائنز لیبر فیڈریشن کی سالانہ رپورٹ کے مطابق سال 2025 کے دوران بلوچستان کی کوئلہ کانوں میں پیش آنے والے مختلف حادثات کے نتیجے میں 89 کانکن ہلاک ہوئے۔
