بلوچ ریپبلکن آرمی کے ترجمان سرباز بلوچ نے میڈیا کو جاری کردہ بیان میں کہا ہے کہ بلوچستان کے ضلع ڈیرہ بگٹی کی تحصیل سوئی کے علاقے گوپٹ میں پاکستانی فوج اور تنظیم کے سرمچاروں کے درمیان دوپہر کے وقت اس وقت جھڑپ ہوئی جب فوجی اہلکاروں نے سرمچاروں کے راستے پر ناکہ بندی کر رکھی تھی۔
ترجمان نے کہا کہ جھڑپوں کا سلسلہ دو گھنٹے تک جاری رہا۔ اس دوران پاکستانی فوج کے تین اہلکار موقع پر ہلاک ہوگئے۔ بعد ازاں، سوئی چھاؤنی سے گوپٹ کی جانب آنے والے ایف سی کے قافلے پر سرمچاروں نے گھات لگا کر راکٹوں اور بھاری ہتھیاروں سے حملہ کیا، جس کے نتیجے میں مزید تین اہلکار ہلاک اور دس سے زائد زخمی ہوگئے۔
سرباز بلوچ کے مطابق، ان جھڑپوں میں سنگت برکت عرف گل بگٹی ولد حیوت بگٹی شہید ہوگئے۔
انہوں نے مزید کہا کہ شہید گل بگٹی گزشتہ آٹھ سالوں سے تنظیم سے وابستہ تھے۔ ان کا تعلق بگٹی قبیلے کی ذیلی شاخ “ہوتکانی” سے تھا۔ وہ ایک نہایت بہادر اور باصلاحیت نوجوان تھے، جن کے خاندان نے بلوچ وطن کے لیے گراں قدر قربانیاں دی ہیں۔
آخر میں ترجمان نے کہا کہ بلوچ ریپبلکن آرمی، شہید گل بگٹی کو ان کی شہادت پر خراجِ عقیدت پیش کرتی ہے۔
