آواران کے علاقے جھاؤ میں آج صبح مسلح افراد نے فوجی قافلے پر شدید حملہ کیا، جس میں متعدد ہلاکتوں کی اطلاعات موصول ہوئی ہیں۔
ذرائع کے مطابق جھاؤ کے علاقے گجرو کور میں آپریشن کے لیے جانے والے پاکستانی فوجی قافلے جن میں موٹر سائیکلیں اور گاڑیاں شامل تھیں، پر آج صبح نامعلوم مسلح افراد نے شدید حملہ کیا۔ بتایا جا رہا ہے کہ حملے کے دوران ایک گھنٹے سے زائد وقت تک دونوں جانب شدید فائرنگ اور متعدد دھماکوں کی آوازیں سنی گئیں۔
علاقائی ذرائع کے مطابق ابھی تک بھی پورے علاقے میں شدید فائرنگ و دھماکوں کی آوازیں سنی جارہی ہے شبہ ہے کہ اب فورسز خود مارٹر و فائرنگ کر رہی ہے۔
حملے کے نتیجے میں متعدد اہلکاروں کے ہلاک اور زخمی ہونے کی اطلاعات ملی ہیں، تاہم حکام کی جانب سے تاحال کوئی مؤقف سامنے نہیں آیا۔
واضح رہے کہ گزشتہ دنوں پاکستانی فوج کے لیے راشن اور دیگر سامان لے جانے والی ایک گاڑی کو مسلح افراد اپنے ساتھ لے گئے تھے۔ اسی مقام پر جب فورسز کے اہلکاروں نے پیش قدمی کی تو گھات میں بیٹھے مسلح افراد نے ان پر شدید حملہ کر دیا۔
حملے کی ذمہ داری تاحال کسی تنظیم نے قبول نہیں کی ہے۔
