بلوچستان کے علاقے کوہ سلیمان، تونسہ شریف میں گزشتہ شب آغوش ہوٹل کے قریب واقع ایک اسٹوڈنٹ چوبارے پر پاکستانی فورسز نے چھاپہ مار کر تین نوجوانوں کو حراست میں لے کر جبری طور پر لاپتہ کر دیا۔
مقامی ذرائع کے مطابق، لاپتہ ہونے والوں میں جمعہ خان مٹھوانی، محمد خان چاکرانی، اور فرسٹ ایئر کے طالبعلم افتخار احمد چاکرانی شامل ہیں۔ یہ تینوں نوجوان تعلیم اور رہائش کی غرض سے تونسہ شہر میں مقیم تھے اور ان کا تعلق کوہ سلیمان کے بزدار قبیلے سے بتایا جاتا ہے۔
عینی شاہدین کا کہنا ہے کہ رات گئے کالی وردی میں ملبوس مسلح افراد نے اچانک چوبارے پر دھاوا بولا اور مذکورہ نوجوانوں کو زبردستی اپنے ہمراہ لے گئے۔
اہل خانہ اور مقامی افراد نے واقعے پر گہری تشویش کا اظہار کرتے ہوئے متعلقہ حکام اور انسانی حقوق کی تنظیموں سے مطالبہ کیا ہے کہ لاپتہ نوجوانوں کو فوری طور پر منظر عام پر لایا جائے اور اگر ان پر کوئی الزام ہے تو انہیں عدالت میں پیش کیا جائے۔
