کوئٹہ، بوائز پوسٹ گریجویٹ کالج سریاب روڈ کے ہاسٹل میں پانی اور بجلی کی طویل بندش کے خلاف طلبہ نے سڑک بلاک کرکے احتجاج کیا۔
طلبہ نے کالج کے سامنے مین سریاب روڈ کو بند کر دیا اور نعرے بازی کرتے ہوئے مطالبہ کیا کہ ہاسٹل میں فوری طور پر پانی اور بجلی کی فراہمی کو یقینی بنایا جائے۔ مظاہرین کا کہنا تھا کہ کئی دنوں سے ہاسٹل میں نہ تو پانی دستیاب ہے اور نہ ہی بجلی، جس کے باعث طلبہ کو سخت گرمی میں شدید پریشانی کا سامنا ہے۔
طلبہ کا مزید کہنا تھا کہ ہاسٹل میں بنیادی سہولیات کی عدم دستیابی تعلیم پر منفی اثر ڈال رہی ہے اور متعلقہ انتظامیہ بار بار شکایات کے باوجود خاموش تماشائی بنی ہوئی ہے۔
مظاہرین نے انتظامیہ کو خبردار کیا کہ اگر ان کے مسائل فوری طور پر حل نہ کیے گئے تو احتجاج کا دائرہ مزید وسیع کیا جائے گا اور کلاسز کا بائیکاٹ بھی کیا جا سکتا ہے۔
احتجاج کے باعث ٹریفک کی روانی متاثر ہوئی، تاہم موقع پر موجود پولیس اہلکاروں نے سڑک بحال کرانے اور طلبہ کو منتشر کرنے کی کوشش کی۔
