بلوچستان کے علاقے حب چوکی سے پاکستانی فوج نے ایک نوجوان کو حراست میں لینے کے بعد جبری طور پر لاپتہ کر دیا ہے۔
ذرائع کے مطابق، لاپتہ ہونے والے نوجوان کی شناخت سکی داد ولد محمد بخش کے نام سے ہوئی ہے، جو جھاؤ پیلار کا رہائشی اور اپنے والدین کا اکلوتا بیٹا ہے۔ اطلاعات کے مطابق، پاکستانی فوج نے دارو ہوٹل پر واقع ان کی ہمشیرہ کے گھر پر چھاپہ مارا اور لوگوں کو تشدد کا نشانہ بنانے کے بعد سکی داد کو زبردستی اپنے ساتھ لے گئی۔
سکی داد کے اہلِ خانہ نے انسانی حقوق کی تنظیموں سے اپیل کی ہے کہ وہ نوجوان کی بازیابی کے لیے آواز بلند کریں۔ سکی داد اپنے گھر کا واحد کفیل تھا، جبکہ ان کے والد محمد بخش آنکھوں سے محروم ہیں۔
اہلِ خانہ نے حکومت سے مطالبہ کیا ہے کہ اگر سِکی داد پر کوئی الزام ہے تو اسے عدالت میں پیش کیا جائے، اور اگر وہ بے گناہ ہے تو فوراً رہا کیا جائے۔
