بلوچستان کے ضلع مستونگ کے علاقے دشت میں مسلح افراد کی بڑی تعداد نے شاہراہ پر ناکہ بندی کر کے لیویز تھانے کو گھیر لیا۔ مسلح افراد نے تھانے میں موجود تمام اسلحہ ضبط کر لیا۔
ذرائع کے مطابق، مسلح افراد نے کوئٹہ سے ملحقہ علاقے دشت سپیزنڈ کے لیویز تھانے پر قبضہ کرنے اور اسلحہ ضبط کرنے کے بعد تھانے کو آگ لگا دی، تاہم لیویز اہلکاروں کو کوئی جانی نقصان نہیں پہنچا۔
واضح رہے کہ اس سے قبل، گزشتہ روز مسلح افراد کی بڑی تعداد نے کردگاپ شہر کو اپنے کنٹرول میں لے کر ناکہ بندی کی، لیویز تھانے پر قبضہ کیا، اسلحہ ضبط کیا اور سرکاری گاڑیوں کو نقصان پہنچایا۔ اس حملے کی ذمہ داری بلوچ آزادی پسند تنظیم بلوچستان لبریشن فرنٹ نے قبول کی تھی۔
آج کے حملے کی ذمہ داری تاحال کسی تنظیم نے قبول نہیں کی ہے۔
