بلوچستان کے ضلع مستونگ میں علیزئی بائی پاس پر نامعلوم افراد کی فائرنگ سے ایک شخص جاں بحق ہو گیا۔ واقعے کے خلاف لواحقین نے احتجاج کرتے ہوئے لاش قومی شاہراہ پر رکھ دی اور سڑک کو ہر قسم کی ٹریفک کے لیے بند کر دیا۔
مظاہرین نے شہید نواب غوث بخش رئیسانی ہسپتال کے سامنے کوئٹہ کراچی قومی شاہراہ کو بلاک کر دیا، جس کے باعث دونوں اطراف گاڑیوں کی طویل قطاریں لگ گئیں اور مسافروں کو شدید مشکلات کا سامنا کرنا پڑا۔
لواحقین کا کہنا تھا کہ ہمارا کسی سے کوئی دشمنی یا رنجش نہیں ہے، قاتلوں کو فوری طور پر گرفتار کیا جائے۔
مظاہرین نے حکام سے مطالبہ کیا کہ ذمہ دار افراد کو جلد از جلد قانون کے کٹہرے میں لایا جائے بصورتِ دیگر احتجاج کا دائرہ وسیع کیا جائے گا۔
پولیس اور ضلعی انتظامیہ کی جانب سے مظاہرین سے مذاکرات جاری ہیں۔
