ضلع کیچ کے علاقے بالگتر میں جبری لاپتہ افراد کے اہل خانہ نے سی پیک منصوبے سے منسلک شاہراہ ایم-8 پر دھرنا دے دیا ہے جس کے باعث سڑک ہر قسم کی ٹریفک کے لیے بند ہو گئی ہے۔ دھرنے میں خواتین اور بچے بھی شریک ہیں، جن کا مؤقف ہے کہ ان کے پیاروں کو بلاجواز جبری طور پر لاپتہ کیا گیا ہے اور انہیں بازیاب کیا جائے۔
احتجاجی مظاہرین کا کہنا ہے کہ جب تک ان کے پیاروں کو بازیاب نہیں کرایا جاتا، دھرنا جاری رہے گا اور سڑک نہیں کھولی جائے گی۔ ان کے مطابق متعدد بار انتظامیہ کو درخواستیں دی گئیں مگر شنوائی نہ ہونے کے باعث وہ مجبوراً سڑکوں پر نکل آئے ہیں۔
شاہراہ کی بندش کے باعث دونوں اطراف سینکڑوں گاڑیاں پھنس گئی ہیں اور تربت، گوادر، پنجگور اور کوئٹہ کے درمیان زمینی رابطہ مکمل طور پر منقطع ہو چکا ہے۔
