بلوچستان کے ضلع واشک کے علاقے سور گزو میں فائرنگ کے تبادلے کے نتیجے میں ایک شخص جاں بحق جبکہ ایک زخمی ہو گیا۔
ذرائع کے مطابق واقعہ اُس وقت پیش آیا جب نامعلوم شخص نے لعل محمد کلاگانی نامی مقامی شخص کا سولر سسٹم چوری کرنے کی کوشش کی۔ لعل محمد نے چور کا تعاقب کیا جس دوران دونوں کے درمیان فائرنگ کا تبادلہ ہوا۔ فائرنگ کے نتیجے میں لعل محمد کلاگانی موقع پر ہی جاں بحق ہو گئے جبکہ مبینہ چور شدید زخمی ہوا۔
ذرائع کا کہنا ہے کہ زخمی شخص غیر مقامی ہے تاہم ابھی تک اس کی شناخت نہیں ہو سکی ہے۔
واقعے کے بعد جاں بحق شخص کی لاش کو ضابطے کی کارروائی کے لیے قریبی اسپتال منتقل کیا گیا، جہاں ضروری مراحل مکمل کرنے کے بعد لاش ورثاء کے حوالے کر دی گئی۔
پولیس واقعے کی مزید تفتیش کر رہی ہے۔
