کیچ کی تحصیل دشت کے علاقہ ہورشولیگ سے تعلق رکھنے والے نوجوان طاہر ولد اللہ بخش کو گزشتہ پیر کے روز گوادر سے پاکستانی فورسز نے حراست میں لے کر لاپتہ کردیا ہے۔ لواحقین کے مطابق طاہر گوادر میں تیل کا کاروبار کرتے تھے اور ان کے پاس ایک گاڑی تھی جسے وہ مرمت کے لیے گیراج لے گئے تھے۔ اس کے بعد سے ان کا کچھ پتہ نہیں چل سکا۔
اہلِ خانہ نے کہا ہے کہ انہوں نے کوسٹ گارڈ سے جب طاہر کے بارے میں پوچھا تو پہلے مرحلے میں اعتراف کیا گیا کہ طاہر ان کی تحویل میں ہیں اور جلد رہا کر دیا جائے گا۔ تاہم دوبارہ رابطہ کرنے پر کوسٹ گارڈ نے اس بات سے انکار کر دیا۔
لواحقین کا کہنا ہے کہ طاہر ایک غیر سیاسی کاروباری نوجوان ہیں جن کا کسی سیاسی جماعت یا سرگرمی سے کوئی تعلق نہیں۔ انہوں نے حکام سے مطالبہ کیا ہے کہ طاہر کو فوری طور پر منظر عام پر لا کر رہا کیا جائے۔
