7 اور 8 مئی کی درمیانی شب پاکستان کے مختلف علاقوں میں انڈیا کی جانب سے ڈرون حملوں کی اطلاعات موصول ہوئی ہیں۔ پاکستانی فوج کے شعبہ تعلقات عامہ (آئی ایس پی آر) کے مطابق بھارت کی جانب سے مجموعی طور پر 12 ڈرون پاکستانی حدود میں بھیجے گئے جن کا ہدف مبینہ طور پر فوجی و شہری تنصیبات تھیں۔
متاثرہ علاقوں میں لاہور، گوجرانوالہ، چکوال، اٹک، راولپنڈی، بہاولپور، میانوچھور (سندھ) اور کراچی شامل ہیں۔ سب سے زیادہ نقصان لاہور اور میانوچھور میں ریکارڈ کیا گیا ہے۔
آئی ایس پی آر کے ترجمان کے مطابق لاہور میں ایک فوجی ہدف کو نشانہ بنایا گیا، جس کے نتیجے میں چار پاکستانی فوجی اہلکار زخمی ہوئے جبکہ بعض فوجی تنصیبات کو بھی نقصان پہنچا۔
مزید برآں سندھ کے علاقے میانوچھور میں ایک ڈرون حملے کے نتیجے میں ایک شہری ہلاک اور ایک زخمی ہوا ہے۔
واضح رہے کہ گزشتہ دنوں انڈیا کے جانب پاکستان پر میزائل حملوں میں 26 افراد ہلاک اور 46 زخمی ہوئے تھے۔
