کیچ: تربت لا کالج کے سیکیورٹی گارڈ سعید بلوچ ولد نیک بخت کی جبری گمشدگی کے خلاف آج ان کے اہلِ خانہ نے ایم 8 شاہراہ کو ہر قسم کی ٹریفک کے لیے بند کر دیا تھا۔
سعید بلوچ کو 5 مارچ کی شام چھ بجے لا کالج تربت سے دورانِ ڈیوٹی سادہ لباس میں ملبوس نامعلوم افراد نے جبری طور پر لاپتا کر دیا تھا۔ وہ گزشتہ آٹھ سال سے بطور سیکیورٹی گارڈ خدمات سرانجام دے رہے تھے۔
احتجاج کے بعد اسسٹنٹ کمشنر کیچ محمد جان نے علاقے کے معززین کے ہمراہ لواحقین سے مذاکرات کیے، جس میں تین دن کے اندر سعید بلوچ کی بازیابی کی یقین دہانی کرائی گئی۔ اس یقین دہانی کے بعد لواحقین نے اپنا دھرنا عارضی طور پر ختم کر دیا اور سی پیک شاہراہ کو وقتی طور پر کھول دیا گیا۔
لواحقین کا کہنا ہے کہ اگر تین دن کے اندر سعید بلوچ کو منظرِ عام پر نہ لایا گیا تو احتجاج کا دائرہ مزید وسیع کر دیا جائے گا اور سخت ردِعمل دیا جائے گا۔
