توتک کی سرزمین ایک بار پھر ظالم قوتوں کی جارحیت کا سامنا کر رہی ہے، لیکن یہاں کے قبائلی سردار اور عوام اپنی غیرت و حمیت کے ساتھ کسی صورت اس جبر کو قبول نہیں کریں گے۔ گزشتہ روز توتک میں ایک عظیم الشان جرگہ منعقد ہوا جس میں مختلف قبائل کے عمائدین نے شرکت کی۔ اس جرگے کی صدارت معروف قبائلی رہنما سردار علی محمد قلندرانی نے کی، جن کے ساتھ خان آف قلات کے فرزند پرنس محمد احمدزئی سمیت دیگر اہم قبائلی سردار بھی شریک ہوئے۔
جرگے میں علاقے میں بدنام زمانہ ڈیتھ اسکواڈ کے قیام، جبری گمشدگیوں اور امن کی بگڑتی صورتحال پر مفصل تبادلہ خیال کیا گیا۔ قبائلی عمائدین نے متفقہ طور پر تین اہم قراردادیں منظور کیں:
بلوچستان بھر میں جبری طور پر لاپتہ کیے گئے افراد کی فوری بازیابی کا مطالبہ؛
توتک سے ڈیتھ اسکواڈ کے فوری انخلا کا مطالبہ، بصورت دیگر شدید عوامی ردعمل؛
اگر حکومت نے ان مطالبات کو نظر انداز کیا تو پھر بلوچستان بھر میں سڑکیں بلاک کر دی جائیں گی۔
سردار علی محمد قلندرانی نے جرگے سے خطاب کرتے ہوئے کہا، "ہمارا ضمیر مطمئن ہے، ہمارے ہاتھ بے گناہوں کے خون سے آلودہ نہیں، ہم نے کوئی جرم نہیں کیا، لیکن میں واضح کرنا چاہتا ہوں کہ ہم اس ظالم کے سامنے سیسہ پلائی دیوار بن کر کھڑے رہیں گے۔” انہوں نے مزید کہا، "ہمیں گزشتہ 15 سال سے بدترین مظالم کا سامنا ہے، لیکن اب ہم مزید ظلم برداشت نہیں کریں گے۔ اگر ریاست نے اس جارحیت کا نوٹس نہ لیا تو پھر عوام اپنے تحفظ اور امن کے لیے خود فیصلہ کریں گے۔ ہم کسی قیمت پر شفیق مینگل جیسے قاتل کو دوبارہ توتک کی زمین پر قبضہ کرنے نہیں دیں گے۔”
انہوں نے کہا کہ یہ جرگہ علاقے کے متاثرین کی ناراضگی اور احتجاج کا عکاس ہے اور بلوچستان کے عوام کے لیے ایک واضح پیغام ہے کہ ظلم اور ریاستی جبر اب برداشت نہیں کیا جائے گا۔
