پنجگور،قلعہ سیفالله( مانیٹرنگ ڈیسک) پنجگور اور قلعہ عبداللہ فائرنگ کے واقعات میں دو افراد قتل ،ڈیرہ مراد جمالی ڈاکووں نے مسافروں کو لوٹ لیا ۔ تفصیلات کے مطابق پنجگورکے علا قے تسپ ہائی سکول کے قریب گاڑی میں سوار مسلح افرادکی فائرنگ سے محمد رفیق نامی شخص ھلاک ہو گیا جسے فوری طورپر ہسپتال منتقل کر دیا گیا جبکہ واقعے کے فوراً بعد ملزمان فرار ہو گئے، واقعے کی اطلاع ملتے ہی پولیس نے جائے وقوعہ پہنچ کر علا قے کو گھیرے میں لینے کے بعد شوا ہد اکھٹے کر کے ملزمان کی تلاش شروع کر دی۔
علاوہ ازیں ضلع قلعہ سیف اللہ کے علاقے بندات پسین زئی میں نامعلوم افراد کی فائرنگ سے ہرنائی کا رہائشی سید نواز شاہ نامی شخص قتل ہوگیا ۔ذرائع کے مطابق قتل کی وجہ رشتے کا تنازعہ بتائی جا رہی ہے، تاہم پولیس نے واقعے کی تحقیقات شروع کر دی ہے۔
پولیس کے مطابق جائے وقوعہ سے شواہد اکٹھے کر لیے گئے ہیں اور نامعلوم ملزمان کی گرفتاری کے لیے کارروائی جاری ہے۔
دریں اثنا ڈیرہ مراد جمالی ،بختیارآباد کی حدود قومی شاہراہ پر ڈاکووں کی لوٹ مار ،لاکھوں روپے نقدی موبائل فونز ودیگر سامان چھین کر فرار،مسافروں کا شدید احتجاج انتظامیہ کے خلاف نعرے بازی کی۔آمدہ اطلاعات کے مطابق لیویز تھانہ بختیارآباد کی مرکزی شاہراہ پر مسلح ڈاکووں نے باقاعدہ چین لگا کر سندھ سے شال،شال سے سندھ جانے والی مسافر ویگن اور دیگر کاروں ٹرکوں کو روک کر ان سے لاکھوں روپے نقدی موبائل فونز ودیگر سامان چھین کر باآسانی فرار ہوگئے ۔
مسافروں نے الزام عائد کیا کہ ڈاکوں نے لیویز کے سامنے لوٹ مار کرتے رہے ہماری چیخ وپکار پر لیویز فورس کے اہلکاروں نے کوئی مدد نہیں کی، بلکل ڈاکووں کو باآسانی فرار ہونے میں ان کی مدد کی ۔ واقعے کے خلاف مسافروں نے شدید احتجاج کرتے ہوئے مرکزی شاہراہ کو بلاک کر کے لیویز فورس کے خلاف نعرے بازی کی اور اہلکاروں کے خلاف قانونی کارروائی کا مطالبہ کیا ۔
