بلوچستان کے دارالحکومت کوئٹہ اور کچھی کے علاقے ڈھاڈر میں دو مختلف مقامات پر بم دھماکوں کی اطلاعات ملی ہیں، تاہم دونوں واقعات میں کوئی جانی نقصان کی اطلاع۔ علاوہ ازیں دشت کے علاقے سے ایک نامعلوم شخص کی لاش برآمد ہوئی ہے۔
پولیس کے مطابق کوئٹہ کے سریاب روڈ پر محکمہ زراعت کے دفتر کے قریب نامعلوم موٹرسائیکل سواروں نے دستی بم پھینکا جو زور دار دھماکے سے پھٹ گیا، تاہم اس سے کوئی شخص زخمی نہیں ہوا۔ دھماکے کے بعد پولیس نے علاقے کو گھیرے میں لے کر شواہد جمع کرنا شروع کر دیے۔
اسی طرح ضلع کچھی کے شہر ڈھاڈر میں سرکٹ آفس کے قریب سڑک کنارے نصب دیسی ساختہ بم پھٹ گیا۔ پولیس کا کہنا ہے کہ اس واقعے میں بھی کوئی جانی نقصان پیش نہیں آیا۔ قانون نافذ کرنے والے اداروں نے علاقے کا محاصرہ کر کے تحقیقات شروع کر دی ہیں۔
دوسری جانب کوئٹہ کے نواحی علاقے دشت سے ایک نامعلوم شخص کی گولیوں سے چھلنی لاش برآمد ہوئی ہے۔ پولیس نے لاش کو تحویل میں لے کر ہسپتال منتقل کیا جہاں ضروری کارروائی کے بعد اسے شناخت کے لیے مردہ خانے میں رکھ دیا گیا ہے۔
