کوئٹہ: بلوچستان کے مشہور بینجو نواز اور بلوچ موسیقی کے اہم سفیر، استاد رفیق بلوچ، انتقال کر گئے۔ استاد رفیق گذشتہ دنوں ڈیرہ غازی خان میں ہونے والے بین الصوبائی ہم آہنگی کنونشن میں شاندار پرفارمنس کے بعد کوئٹہ جاتے ہوئے لورالائی کے مقام پر اچانک بیمار ہو گئے تھے۔
استاد رفیق بلوچ نے بلوچ ساز “بینجو” کو عالمی سطح پر متعارف کرایا اور اپنی موسیقی کے ذریعے بلوچ ثقافت کو دنیا بھر میں اجاگر کرنے میں اہم کردار ادا کیا۔ ان کی موسیقی نہ صرف بلوچستان بلکہ بیرون ملک بھی سُر، راگ اور ثقافتی اظہار کا آئینہ تھی۔
ان کے انتقال پر موسیقی کی دنیا اور ان کے چاہنے والے غمزدہ ہیں۔ ان کی شخصیت میں انکساری، شفقت اور زندگی سے محبت نمایاں تھی۔ دوستوں کے درمیان وہ ہمیشہ خوش دِل اور قہقہوں سے بھرپور رہتے تھے اور اپنی زندگی ہر لمحہ بھرپور انداز میں جیتے تھے۔
