بلوچستان اسمبلی کے حالیہ فیصلے کے خلاف کہ لیویز فورس کو ختم کرکے پولیس میں ضم کیا جائے، تربت میں ہفتے کے روز لیویز اہلکاروں نے ریلی نکالی اور شہید فدا چوک پر احتجاج کیا۔
ریلی میں لیویز فورس کے اہلکاروں کی بڑی تعداد نے شرکت کی اور پولیس میں انضمام کے خلاف نعرے بازی کی۔ اہلکاروں نے کہا کہ لیویز فورس نے بلوچستان میں امن و امان قائم رکھنے، مقامی سطح پر جرائم کی روک تھام، روایات کے احترام اور بروقت انصاف کی فراہمی میں ہمیشہ اہم کردار ادا کیا ہے۔
احتجاج کے دوران اہلکاروں نے لیویز کے شہداء کی قربانیوں کو خراجِ عقیدت پیش کیا اور فورس کو ایک بہادر مقامی طاقت قرار دیتے ہوئے اسے پولیس میں ضم کرنے کے اقدام کو سازش قرار دیا۔
اہلکاروں نے حکومت اور متعلقہ حکام سے مطالبہ کیا کہ لیویز فورس کی خدمات اور قربانیوں کو نظر انداز کیے بغیر اسے اپنی موجودہ شکل میں برقرار رکھا جائے۔
