بلوچ ریپبلکن پارٹی کے زیرِ اہتمام نواب اکبر بگٹی کی برسی کے موقع پر لندن میں ایک تعزیتی ریفرنس کا انعقاد کیا گیا، جس میں بلوچ، سندھی اور پشتون قوم پرست رہنماؤں سمیت مختلف کمیونٹیز کے افراد نے بڑی تعداد میں شرکت کی۔
ریفرنس سے خطاب کرتے ہوئے مقررین نے نواب اکبر بگٹی کی جدوجہد اور قربانیوں کو خراجِ تحسین پیش کیا۔ ان کا کہنا تھا کہ نواب بگٹی نے اپنی زندگی کے آخری لمحے تک بلوچ عوام کے حقوق اور اپنی سرزمین کے وقار پر کوئی سمجھوتہ نہیں کیا۔ مقررین نے کہا کہ ان کا بہادرانہ مؤقف اور اصولی جدوجہد تاریخ میں ہمیشہ زندہ رہے گی۔
اس موقع پر شیر محمد بگٹی نے اپنے خطاب میں کہا کہ نواب اکبر بگٹی کی جدوجہد نہ صرف بلوچ عوام بلکہ دنیا کی تمام مظلوم قوموں کے لیے ایک سنگِ میل ہے۔ انہوں نے کہا کہ ان کی قربانی آئندہ نسلوں کے لیے مشعلِ راہ کی حیثیت رکھتی ہے۔
ریفرنس کے اختتام پر شرکاء نے اس عزم کا اظہار کیا کہ وہ نواب اکبر بگٹی کے مشن کو جاری رکھیں گے اور مظلوم اقوام کے حقوق کے لیے اپنی جدوجہد کو مزید تیز کریں گے۔
