بلوچستان کے ساحلی شہر میں پاکستانی فورسز نے مختلف علاقوں سے چار افراد کو حراست میں لینے کے بعد لاپتہ کر دیا ہے۔
گوادر میں فورسز نے دو نوجوان بھائیوں، اسامہ اور صداقت ولد حاجی ایوب کو حراست میں لے کر نامعلوم مقام پر منتقل کر دیا ہے۔ ذرائع کے مطابق دونوں بھائی ایک مقامی دکان میں موجود تھے جنہیں فورسز زبردستی گاڑی میں ڈال کر اپنے ساتھ لے گئیں۔ واقعے کے بعد نہ تو ان کی گرفتاری ظاہر کی گئی اور نہ ہی ان کے بارے میں کوئی معلومات فراہم کی گئی ہے۔
گوادر کے علاقے جیونی سے سید محمد شاہو نامی نوجوان کو چار روز قبل ایک بار پھر پاکستانی فورسز نے حراست میں لیا ہے، جس کے بعد وہ بھی لاپتہ ہیں۔ مقامی ذرائع کے مطابق، انہیں پہلے بھی حراست میں لیا گیا تھا اور کئی دن جبری گمشدگی کے بعد میں رہا کر دیا گیا تھا۔
گزشتہ شب چار بجے کے قریب، پسنی کے وارڈ نمبر 4 سے پاکستانی فورسز نے ایک نوجوان طالب علم سراج ولد اسلم کو گھر سے حراست میں لے کر لاپتہ کر دیا۔
لاپتہ نوجوانوں کی اہلِ خانہ نے اپنے پیاروں کی بازیابی کی اپیل کی ہے۔
