شال : بلوچ نسل کشی کے خلاف جاری احتجاج کے پس منظر میں بلوچ یکجہتی کمیٹی نے آج بدھ (تین جنوری ) کو بلوچستان کے علاوہ پاکستانی بندوبست کے دیگر شہروں میں ہڑتال کی کال دے تھی۔ بی وائی سی کی کال پر بلوچستان کے قصبوں اور چھوٹے بڑے شہروں میں کاروباری افراد نے رضاکارانہ طور پر دکانیں بند کرکے جاری تحریک سے ہمدردی کا اظہار کیا۔
ڈیرہ غازی خان ، سنگر ( تونسہ ) ، راجن پور، رکنی ، کوھلو ، شال ، نوشکے ، بلیدہ ، خضدار ، کلات ، نال ، سوراب ، بسیمہ ، وندر ، آواران، نصیر آباد ، ڈیرہ مراد جمالی ، ڈیرہ رحمان جمالی ، زھری ، چاغی ، آمین آباد ، واشک ، گوادر ، پسنی ، تمپ اور بلیدہ سمیت دیگر علاقوں میں شٹرڈاؤن ہڑتال کے باعث بازار بند رہے۔
بلوچستان کے بعض علاقوں میں شٹر ڈاؤن ہڑتال کے ساتھ احتجاجی مظاہرے بھی کیے گئے۔ماشکیل میں فرنیٹر کور ( ایف سی) کیمپ کے سامنے احتجاجی مظاہرہ کیا گیا۔ مظاہرے میں بلوچ نسل کشی کے خلاف لانگ مارچ کے شرکاء کے ساتھ اسلام آباد پولیس کے ناروا سلوک کے خلاف بھی شدید نعرے بازی کی گئی۔
