گوادر: بلوچستان کے ضلع گوادر کے ساحلی علاقے جیونی کے پانوان میں پاکستانی فورسز کی کارروائی کے دوران مزید 10 مکانات مسمار کر دیے گئے۔
ذرائع کے مطابق یہ کارروائی 6 جولائی کو کی گئی، جس میں بھاری مشینری اور بلڈوزرز کے ذریعے متعدد رہائشی مکانات کو منہدم کیا گیا۔ متاثرہ خاندانوں کے مطابق مسمار کیے گئے گھروں میں محمد جان کلمتی، خالد کلمتی، جعفر کلمتی، غلام نبی کلمتی اور یارجان کلمتی کے مکانات شامل ہیں، جبکہ غلام نبی کلمتی کے سات کمروں پر مشتمل گھر کو بھی منہدم کر دیا گیا۔
متاثرہ خاندانوں کا کہنا ہے کہ کارروائی کے دوران گھروں میں موجود سامان باہر نکال دیا گیا اور ان کی ایک گاڑی بھی اپنے ساتھ لے جائی گئی، جس کے باعث وہ بے گھر ہو گئے ہیں۔
