بلوچستان کے ضلع قلات کے علاقے کاریز نیمرغ میں نامعلوم مسلح افراد کی فائرنگ سے ایک شخص اپنے محافظ سمیت ہلاک جبکہ ایک اور محافظ زخمی ہو گیا۔
ذرائع کے مطابق عبدالرحیم ساسولی عرف سخی ساسولی اس وقت اپنے ٹیوب ویل پر موجود تھے جب مسلح افراد نے ان پر حملہ کر دیا۔ فائرنگ کے نتیجے میں عبدالرحیم ساسولی سکنہ نیمرغ اور ان کے محافظ ظفراللہ ولد سعداللہ، سکنہ گدر سوراب موقع پر ہی جاں بحق ہو گئے۔
واقعے میں ایک اور محافظ اکرام ولد نور محمد، سکنہ نیمرغ شدید زخمی ہو گئے، جنہیں ابتدائی طبی امداد کے لیے سول ہسپتال قلات منتقل کیا گیا، بعد ازاں حالت تشویشناک ہونے پر انہیں مزید علاج کے لیے کوئٹہ ریفر کر دیا گیا۔
واقعے کے بعد حملہ آور فرار ہونے میں کامیاب ہو گئے، جبکہ پولیس نے جائے وقوعہ پر پہنچ کر تحقیقات شروع کر دی ہیں۔ تاحال حملے کی وجوہات اور ذمہ داران کے حوالے سے کوئی باضابطہ موقف سامنے نہیں آیا۔
