بلوچستان کے مختلف علاقوں میں سیکیورٹی کی صورتحال کشیدہ ہونے کی اطلاعات ہیں، جہاں مسلح افراد کی کارروائیوں اور دھماکوں کے نتیجے میں جانی نقصانات کی خبریں سامنے آئی ہیں۔
تفصیلات کے مطابق سوراب میں مسلح افراد نے ایک کسٹم پوسٹ پر قبضہ کر لیا۔ ذرائع کا کہنا ہے کہ حملہ آوروں نے وہاں تعینات تمام اہلکاروں کو حراست میں لے کر ان کا اسلحہ بھی اپنے قبضے میں لے لیا۔
علاقائی ذرائع کے مطابق جب فورسز نے علاقے میں پیش قدمی کی کوشش کی تو مسلح افراد نے گھات لگا کر حملہ کیا۔ حملے میں راکٹوں اور دیگر بھاری ہتھیاروں کا استعمال کیا گیا، جس کے نتیجے میں جانی نقصانات کی اطلاعات ہیں۔ تاہم سرکاری حکام کی جانب سے تاحال اس حوالے سے کوئی باضابطہ بیان جاری نہیں کیا گیا۔
دوسری جانب ضلع خضدار ہی کے علاقے زہری میں بھی ایک دھماکے کی اطلاع ملی ہے۔ ذرائع کے مطابق بلبل، گورگ کے مقام پر فورسز کی ایک گاڑی کو اس وقت نشانہ بنایا گیا جب وہ قافلے کی صورت میں گزر رہی تھی۔
دھماکے کے نتیجے میں متعدد اہلکاروں کے ہلاک یا زخمی ہونے کی اطلاعات ہیں، تاہم حکام نے اس واقعے کی تفصیلات بھی ابھی تک جاری نہیں کیں۔
