پنجگور کے علاقے خدابادان سے پاکستانی فورسز کے حراست میں لیے جانے کے بعد لاپتہ ہونے والے نوجوان اویس احمد بلوچ کی لاش ملنے کی اطلاعات سامنے آئی ہیں۔ اہلِ خانہ کا کہنا ہے کہ انہیں زخمی حالت میں پاکستانی فورسز اپنے ساتھ لے گئی تھیں اور بعد ازاں قتل کرکے لاش پھینک دی گئی۔
مقامی ذرائع کے مطابق گزشتہ رات خدابادان میں متعدد گھروں پر چھاپے مارے گئے، اس دوران فائرنگ کی بھی اطلاعات ہیں۔ اہلِ خانہ کا کہنا ہے کہ کارروائی کے دوران اویس احمد ولد یار محمد زخمی ہوئے تھے اور انہیں اسی حالت میں تحویل میں لے جایا گیا۔
ذرائع کے مطابق اس کارروائی میں جن افراد کو حراست میں لے کر لاپتہ کیا گیا ان میں بختیار ولد حاجی محمد حسن، عرفان ولد حاجی محمد حسن، بلال ولد حاجی محمد حسن، اویس احمد ولد یار محمد اور حسن ولد خلیل شامل ہیں۔ اہلِ خانہ کا کہنا ہے کہ بختیار، عرفان اور بلال آپس میں سگے بھائی ہیں۔
خاندان کے افراد کا مؤقف ہے کہ چھاپوں کے دوران خواتین اور بچوں کو ہراساں کیا گیا اور گھروں میں توڑ پھوڑ بھی کی گئی۔
