بلوچستان کے مختلف علاقوں میں پیش آنے والے دو الگ الگ ٹریفک حادثات کے نتیجے میں تین افراد ہلاک ہو گئے۔
پہلا حادثہ مکران کوسٹل ہائی وے (ایم-8) پر زیرو پوائنٹ کے قریب پیش آیا، جہاں زمیاد اور ٹرک کے درمیان شدید تصادم ہوا۔ ریسکیو 1122 کے میڈیکل ایمرجنسی رسپانس سینٹر (MERC) نلینٹ کے مطابق حادثہ منگل کی صبح 7 بج کر 20 منٹ پر پیش آیا۔ اطلاع ملنے پر ریسکیو ٹیم 15 منٹ کے اندر موقع پر پہنچ گئی۔
ریسکیو حکام کے مطابق زمیاد میں سوار دونوں افراد سر اور جسم کے مختلف حصوں پر شدید چوٹیں آنے کے باعث موقع پر ہی ہلاک ہو گئے۔ بعد ازاں ضروری قانونی کارروائی کے بعد دونوں لاشوں کو سول اسپتال گوادر منتقل کر دیا گیا۔
ہلاک ہونے والوں کی شناخت ظفر علی ولد اسماعیل ساکن تربت اور امیر احمد ولد عبداللہ ساکن بلیدہ کے نام سے ہوئی ہے۔ حادثے کی وجوہات جاننے کے لیے تحقیقات جاری ہیں۔
دوسرا حادثہ دشت کے علاقے کھڈان کراس ایم-8 شاہراہ پر پیش آیا، جہاں ال داؤ کوچ اور موٹر سائیکل کے درمیان تصادم کے نتیجے میں موٹر سائیکل سوار پولیس اہلکار اللہ بخش موقع پر ہلاک ہو گئے۔
عینی شاہدین کے مطابق حادثہ تیز رفتاری کے باعث پیش آیا۔ اطلاع ملتے ہی پولیس اور ریسکیو اہلکار موقع پر پہنچ گئے اور لاش کو ضروری کارروائی کے بعد قریبی اسپتال منتقل کر دیا گیا۔
پولیس کے مطابق مرحوم اللہ بخش کا تعلق پولیس ڈیپارٹمنٹ سے تھا جبکہ واقعے کی مزید تحقیقات جاری ہیں۔
