مکران کوسٹل ہائی وے کے قریب کنڈ ملیر کے مقام پر ایک حادثہ پیش آیا، جہاں گیس بوزر اور مسافر کوچ کے درمیان تصادم کے نتیجے میں دونوں گاڑیوں میں آگ بھڑک اٹھی۔ حادثے میں 4 افراد جھلس کر ہلاک ہو گئے جبکہ 2 افراد زخمی ہو گئے۔
میونسپل کمیٹی اوتھل کی فائر بریگیڈ کی گاڑی جائے حادثہ پر آگ بجھانے کے لیے روانہ کر دی گئی تھی۔ ذرائع کے مطابق یہ واقعہ آج صبح کوسٹل ہائی وے کنڈملیر سے توڑاہ آگے نلی اوترائی میں پیش آیا۔
لاشوں اور زخمیوں کو فوری طور پر ایدھی ایمبولینسز کے ذریعے قریبی ہسپتال منتقل کیا گیا، جہاں زخمیوں کو طبی امداد دی جا رہی ہے۔ پولیس اور متعلقہ حکام نے جائے حادثہ کا دورہ کر کے تحقیقات کا آغاز کر دیا ہے۔
