بلوچستان سے تعلق رکھنے والے معروف سوشل میڈیا اسٹار ابوبکر عرف “چی بابا” نے افغانستان واپسی کا فیصلہ کر لیا ہے۔ ذرائع کے مطابق وہ آئندہ تین روز میں افغانستان روانہ ہوں گے۔
چی بابا نے اپنے بیان میں کہا کہ بلوچ عوام کا پیار اور عزت ہی ان کے لیے سب کچھ ہے۔ ان کے مطابق، “ہم نے بلوچستان میں جو نام اور عزت کمائی، وہ ہمارے لیے فخر کی بات ہے۔ بلوچ قوم نے ہمیں بھائیوں کی طرح چاہا۔”
چی بابا کے والد نے میڈیا سے گفتگو میں تصدیق کی کہ ان کے خاندان کا تعلق افغانستان سے ہے، تاہم وہ طویل عرصے سے بلوچستان میں مقیم ہیں۔ ان کا کہنا تھا کہ “بلوچ عوام کی محبت کو ہم ہمیشہ یاد رکھیں گے۔”
چی بابا گزشتہ چند برسوں میں سوشل میڈیا پر مزاحیہ ویڈیوز اور منفرد اندازِ گفتگو کی وجہ سے شہرت حاصل کر چکے ہیں۔ ان کے ٹک ٹاک، انسٹاگرام اور یوٹیوب پر لاکھوں فالورز ہیں۔
ان کی متوقع روانگی کی اطلاع پر مداحوں نے سوشل میڈیا پر #GoodLuckCheBaba کے ہیش ٹیگ کے تحت نیک تمناؤں کا اظہار کیا ہے۔
