بلوچستان کے ضلع قلات کے علاقے رئیس توک شادیزئی میں نامعلوم مسلح افراد نے مسجد کے اندر فائرنگ کر دی، جس کے نتیجے میں مؤذن شیر احمد جتک ولد شاہ مراد موقع پر ہی جاں بحق ہوگئے۔
پولیس کے مطابق واقعہ فجر کے وقت اذان کے دوران پیش آیا، جب نامعلوم حملہ آوروں نے مسجد میں گھس کر مؤذن کو نشانہ بنایا۔ فائرنگ کے بعد ملزمان موقع سے فرار ہونے میں کامیاب ہوگئے۔
واقعے کی اطلاع ملتے ہی پولیس جائے وقوعہ پر پہنچ گئی اور لاش کو ضروری کارروائی کے لیے ڈی ایچ کیو اسپتال قلات منتقل کر دیا گیا۔ پولیس نے علاقے میں سرچ آپریشن شروع کر دیا ہے جبکہ واقعے کی تحقیقات جاری ہیں۔
تاہم تاحال قتل کے محرکات معلوم نہیں ہوسکے ہیں۔
