بلوچستان کے دارالحکومت کوئٹہ میں منگل کے روز فرنٹیئر کانسٹیبلری (ایف سی) کے ہیڈکوارٹرز کے باہر ایک شدید دھماکے اور فائرنگ کے واقعے میں کم از کم 10 افراد ہلاک اور درجنوں زخمی ہو گئے۔ ہلاک شدگان میں پاکستانی فورسز کے اہلکار بھی شامل ہیں۔
پولیس کے مطابق حملہ آور کار سے اتر کر اہلکاروں پر فائرنگ کر رہے تھے، جس کے جواب میں اہلکاروں نے بھی فائرنگ کی۔
دھماکے کی شدت اتنی زیادہ تھی کہ اس کی آواز کئی کلومیٹر دور تک سنی گئی۔ زخمیوں اور لاشوں کو فوری طور پر قریبی ہسپتال منتقل کر دیا گیا، جبکہ آس پاس کی عمارتوں کے شیشے ٹوٹ گئے اور گاڑیوں کو بھی نقصان پہنچا۔
اس وقت تک کسی تنظیم نے حملے کی ذمہ داری قبول نہیں کی ہے۔
صوبائی وزیر صحت بخت کاکڑ نے کہا ہے کہ ہلاکتوں کی تعداد میں اضافے کا امکان ہے۔ مقامی ٹی وی اور سی سی ٹی وی فوٹیج میں دیکھا جا سکتا ہے کہ ایک کار ایف سی ہیڈکوارٹرز کے گیٹ کے سامنے رکی، جس کے بعد زوردار دھماکہ ہوا۔
