بلوچستان کے ضلع قلات کے علاقے منگچر میں ایک شخص کی نعش برآمد ہوئی ہے۔ مقامی ذرائع کے مطابق علاقہ مکینوں نے لاش کی اطلاع لیویز فورس کو دی۔ لیویز نے موقع پر پہنچ کر لاش کو اپنی تحویل میں لیا اور بعدازاں شناخت کے لیے آر ایچ سی مندے حاجی منتقل کردیا۔
لاش کی شناخت صفی اللہ ولد عبدالوہاب، سکنہ کوہک حال کھڈکوچہ کے نام سے ہوئی۔ لیویز حکام کا کہنا ہے کہ فوری طور پر کسی قسم کی وجہ یا حالات سامنے نہیں آئے تاہم واقعے کی مزید تفتیش جاری ہے۔
قانونی کارروائی کے بعد لاش ورثاء کے حوالے کردی گئی۔
دوسری جانب نوشکی سے چار ماہ قبل جبری طور پر لاپتہ ہونے والے طارق بلوچ بازیاب ہوکر اپنے گھر پہنچ گئے ہیں۔ خاندانی ذرائع نے تصدیق کی ہے کہ انہیں گزشتہ شب رہا کیا گیا ہے۔
اہل خانہ کے مطابق طارق بلوچ کو پاکستانی فورسز نے ان کے گھر سے حراست میں لیا تھا جس کے بعد ان کا کوئی پتہ نہ چل سکا۔ ان کی گمشدگی کے باعث خاندان شدید ذہنی دباؤ اور کرب میں مبتلا رہا۔ بازیابی کے بعد اہل خانہ نے اطمینان کا اظہار کیا ہے۔
