کراچی بار ایسوسی ایشن نے کاؤنٹر ٹیررازم ڈپارٹمنٹ (سی ٹی ڈی) کی کارروائیوں کو غیر قانونی اور کھلی زیادتی قرار دیتے ہوئے صادق بلوچ کی فوری رہائی اور شفاف تحقیقات کا مطالبہ کیا ہے۔
ایسوسی ایشن کے جاری کردہ اعلامیے کے مطابق 22 اگست 2025 کو ملیر کے علاقے صدیق گوٹھ ڈگ میں ایڈووکیٹ عمران کلمتی کے کزن صادق کو اہلکاروں نے بغیر وارنٹ حراست میں لے لیا۔ اہلخانہ اور اہلِ محلہ کے مطابق کارروائی کے دوران خواتین اور بچوں کو ہراساں کرنے اور ان کی تذلیل و تشدد کے واقعات بھی پیش آئے، جو انسانی حقوق اور قانون کی صریح خلاف ورزی ہے۔
کراچی بار نے مؤقف اختیار کیا ہے کہ اگر صادق پر کوئی قابل دست اندازی جرم عائد ہے تو باضابطہ مقدمہ چلایا جائے، بصورت دیگر فوری طور پر رہا کیا جائے۔ اعلامیے میں مزید کہا گیا ہے کہ واقعے کی غیر جانبدار تحقیقات کر کے ملوث CTD اہلکاروں کے خلاف کارروائی عمل میں لائی جائے تاکہ شہریوں کے بنیادی حقوق کا تحفظ یقینی بنایا جا سکے۔
کراچی بار نے اس اعلامیے کی کاپی آئی جی سندھ، ایڈیشنل آئی جی کراچی رینج اور ڈی جی CTD کو بھی ارسال کی ہے۔
