کراچی کے علاقے صادق گوٹھ میں سی ٹی ڈی اور خفیہ اداروں کے کارندوں نے ایک نوجوان کو زبردستی حراست میں لینے کے بعد جبری طور پر لاپتہ کردیا۔
ذرائع کے مطابق لاپتہ نوجوان کی شناخت صادق بلوچ ولد مراد بخش کے نام سے ہوئی ہے۔ بتایا جارہا ہے کہ گزشتہ رات سی ٹی ڈی اور خفیہ اداروں کے کارندوں نے علاقے میں چھاپے مارے، اس دوران کئی بلوچوں کے گھروں میں داخل ہوکر لوگوں کو ہراساں اور تشدد کا نشانہ بھی بنایا گیا جبکہ دوران صادق بلوچ کو حراست میں لینے کے بعد نامعلوم مقام پر منتقل کردیا گیا۔
لاپتہ نوجوان کے اہل خانہ نے اس واقعے پر شدید تشویش کا اظہار کرتے ہوئے کہا ہے کہ صادق بلوچ کو فوری طور پر منظرِ عام پر لایا جائے اور عدالت میں پیش کیا جائے۔ انہوں نے انسانی حقوق کی تنظیموں اور حکام بالا سے اپیل کی ہے کہ نوجوان کی بازیابی کے لیے فوری اقدامات کیے جائیں۔
