بلوچستان کے علاقے سوراب میں گزشتہ رات مسلح افراد نے مختلف مقامات پر ناکہ بندی کی، اور سنیپ چیکنگ کا سلسلہ کافی دیر تک جاری رہا۔ اطلاعات کے مطابق، مسلح افراد نے ایک کسٹم چوکی پر قبضہ کر کے وہاں موجود اسلحہ اور دیگر ساز و سامان بھی ضبط کر لیا ہے۔
ذرائع کے مطابق، پاکستانی فورسز نے جب مسلح افراد کی ناکہ بندی کے مقام پر پیش قدمی کی کوشش کی، تو اس دوران جھڑپ شروع ہو گئی جو کافی دیر تک جاری رہی۔ بعد ازاں، جب فورسز کی کمک کے لیے آنے والا قافلہ مذکورہ مقام پر پہنچنے کی کوشش کر رہا تھا، تو گھات میں بیٹھے مسلح افراد نے اسے شدید حملے کا نشانہ بنایا۔ حملہ کافی دیر تک جاری رہا، جس کے نتیجے میں فورسز کو جانی و مالی نقصانات کی اطلاعات موصول ہوئی ہیں۔
مزید اطلاعات کے مطابق، ناکہ بندی کے دوران مسلح افراد نے کوئٹہ-کراچی شاہراہ پر گیس لے جانے والی متعدد باؤزر گاڑیوں کو روک کر نقصان پہنچایا اور انہیں نذر آتش کر دیا۔
تاحال ان کارروائیوں کی ذمہ داری کسی تنظیم نے قبول نہیں کی، تاہم ماضی میں اس نوعیت کے حملوں کی ذمہ داری بلوچ آزادی پسند تنظیمیں قبول کرتی رہی ہیں۔
