بلوچستان کے ضلع کیچ میں نامعلوم افراد کی فائرنگ سے ایک شخص جاں بحق ہوگیا، جبکہ آواران اور نوشکی سے پاکستانی فورسز کے ہاتھوں دو افراد کے جبری لاپتہ ہونے کی اطلاعات سامنے آئی ہیں۔ دوسری جانب کوئٹہ کے نواحی علاقے میں فائرنگ کے ایک واقعے میں خاتون سمیت دو افراد زخمی ہوگئے۔
تفصیلات کے مطابق ضلع کیچ کے علاقے نذر آباد میں نامعلوم مسلح افراد نے فائرنگ کرکے ایک شخص کو قتل کردیا۔ مقتول کی شناخت سلام ولد غلام حسین کے نام سے ہوئی ہے۔ لاش کو ضروری کارروائی کے لیے اسپتال منتقل کردیا گیا، تاہم واقعے کے محرکات تاحال معلوم نہیں ہوسکے۔
دوسری جانب ضلع آواران کے علاقے جھاؤ سے 8 جون کو لیویز اہلکار آصف ولد ابراہیم کو پاکستانی فورسز کے حمایت یافتہ ڈیتھ اسکواڈ کے کارندوں نے حراست میں لے کر لاپتہ کردیا۔جن کے بارے میں تاحال کوئی اطلاع نہیں ہے۔
اسی طرح ضلع نوشکی کے علاقے مل محمد خان سے تعلق رکھنے والے نوجوان فٹبالر عزیز احمد عرف میر اے ولد غلام فاروق کو پاکستانی فورسز نے ناکہ بندی کے دوران حراست میں لے کر نامعلوم مقام پر منتقل کردیا ہے۔ عزیز احمد کے اہلخانہ نے ان کی فوری اور بحفاظت بازیابی کا مطالبہ کیا ہے۔
دریں اثناء بلوچستان دارالحکومت کوئٹہ کے علاقے قمبرانی روڈ پر نامعلوم مسلح افراد نے فائرنگ کرکے خاتون سمیت دو افراد کو زخمی کردیا۔ زخمیوں کو فوری طور پر اسپتال منتقل کیا گیا، جہاں ان کا علاج جاری ہے۔ پولیس نے واقعے کی تحقیقات شروع کردی ہیں تاہم حملہ آور فرار ہونے میں کامیاب ہوگئے۔
