بلوچستان کے مختلف اضلاع میں پیش آنے والے فائرنگ کے نتیجے میں تین افراد ہلاک جبکہ ایک نامعلوم شخص کی ہتھکڑی بندھی لاش برآمد ہوئی ہے۔
ضلع مستونگ کے علاقے سنگر میں واقع ولی خان تھانہ کی حدود میں نامعلوم افراد کی فائرنگ سے پڈنگ آباد کا رہائشی منیر احمد ولد خدابخش سرمستانی ہلاک ہوگیا۔ لیویز ذرائع کے مطابق، حملہ آور موقع واردات کے فوراً بعد فرار ہونے میں کامیاب ہو گئے۔ واقعے کی اطلاع پر لیویز فورس موقع پر پہنچی، لاش کو تحویل میں لے کر ضابطے کی کارروائی مکمل کی گئی اور بعد ازاں ورثا کے حوالے کر دی گئی۔ تاہم فائرنگ کی وجوہات تاحال معلوم نہیں ہوسکیں۔
دوسری جانب ضلع خضدار کی تحصیل کرخ میں پیش آنے والے ایک اور واقعے میں فائرنگ کے نتیجے میں گورنمنٹ اسکول کے استاد گلزار ساسولی اور ان کا ساتھی حامد احمد ہلاک ہوگئے۔ دونوں افراد موٹر سائیکل پر سوار تھے کہ پیر ابراہیم کرخ کے مقام پر نشانہ بنایا گیا۔
ذرائع کے مطابق، گلزار ساسولی اس سے قبل بھی متعدد بار قاتلانہ حملوں کا نشانہ بن چکے تھے، جن میں وہ محفوظ رہے تھے۔ اس بار وہ جانبر نہ ہوسکے۔
اسی روز خضدار کی تحصیل زہری کے علاقے نورگامہ گیٹ وے کے قریب سے ایک نامعلوم شخص کی لاش برآمد ہوئی۔ مقتول کے ہاتھ ہتھکڑیوں سے بندھے ہوئے تھے۔ مقامی لوگوں کا کہنا ہے کہ لاش ملنے سے کچھ دیر قبل علاقے میں فائرنگ کی آواز سنی گئی تھی۔ لاش کو اسپتال منتقل کر دیا گیا ہے۔ قتل کے محرقات معلوم نہیں ہوسکے۔
