بھارت کی ریاست اتراکھنڈ میں واقع ہندو یاترا کے معروف مقام کیدارناتھ کے قریب ایک نجی ہیلی کاپٹر گر کر تباہ ہو گیا، جس کے نتیجے میں پائلٹ سمیت تمام سات افراد ہلاک ہو گئے۔
تفصیلات کے مطابق، حادثہ اتوار کی صبح تقریباً ساڑھے پانچ بجے اس وقت پیش آیا جب ایرین ایوی ایشن کی جانب سے چلایا جانے والا Bell 407 ماڈل ہیلی کاپٹر کیدارناتھ سے گپت کاشی کی جانب روانہ ہوا۔ پرواز کے کچھ ہی دیر بعد رودراپریاگ ضلع کے گوری کند کے جنگلاتی علاقے میں ہیلی کاپٹر گر کر تباہ ہو گیا۔
ریاستی ڈیزاسٹر ریسپانس فورس (SDRF)، مقامی پولیس اور دیگر امدادی ادارے فوری طور پر جائے وقوعہ پر پہنچ گئے۔ ریسکیو حکام کے مطابق، پائلٹ راج ویر سنگھ سمیت تمام مسافر ہلاک ہو چکے تھے اور ان کی لاشیں شدید طور پر جھلس چکی تھیں۔
حادثے میں ہلاک ہونے والوں میں مہاراشٹرا، گجرات اور اتر پردیش سے تعلق رکھنے والے زائرین شامل تھے، جن میں ایک دو سالہ بچی بھی موجود تھی۔
یاد رہے کہ یہ کیدارناتھ کے قریب حالیہ دنوں میں پیش آنے والا تیسرا ہوائی حادثہ ہے۔ اس سے قبل مئی اور جون میں بھی دو حادثات پیش آ چکے ہیں، جن میں مجموعی طور پر دس سے زائد افراد جان کی بازی ہار چکے ہیں
