مستونگ سے تعلق رکھنے والے نوجوان احسان شاہ کے مبینہ ماورائے عدالت قتل نے بلوچستان میں انسانی حقوق کے حوالے سے سنگین سوالات کھڑے کر دیے ہیں۔ احسان شاہ کی والدہ کا کہنا ہے کہ ان کے بیٹے کا خون سوال کر رہا ہے اور اس کا جواب صرف انصاف ہے۔
انہوں نے کہا، “اگر میرا بیٹا مجرم تھا تو اس کا جرم ثابت کیا جائے، ورنہ قاتلوں کو سزا دی جائے، یا مجھے بھی گولی مار دی جائے۔”
والدہ نے ریاستی اداروں سے مخاطب ہوتے ہوئے کہا کہ انہیں اب جواب دینا ہوگا کہ آیا وہ عوام کے محافظ ہیں یا ان کے لیے مستقل خطرہ۔ ان کا کہنا تھا، یہ محافظ نہیں بلکہ قاتل ہیں۔
احسان شاہ کی والدہ کے مطابق، ان کے بیٹے کا وہ دوست جو واقعے میں زخمی ہوا تھا، اس کے خاندان کو فورسز کی جانب سے دھمکایا جا رہا ہے کہ وہ کوئی بیان یا گواہی نہ دے، ورنہ پورے خاندان کو نقصان پہنچا کر غائب کر دیا جائے گا۔
انہوں نے کہا، مجھے معلوم ہے کہ یہ طاقتور ہیں، مجھے انصاف نہیں ملے گا، لیکن ایک ماں کی حیثیت سے میں ان اداروں سے انصاف کا مطالبہ کرتی ہوں۔
