بلوچستان کے مختلف علاقوں سے پاکستانی فورسز نے چار افراد کو حراست میں لینے کے بعد جبری طور پر لاپتہ کر دیا ہے۔
ذرائع کے مطابق گزشتہ رات اورماڑہ سے پاکستانی فورسز نے صغیر کے ساتھ ان کے ساتھی اکرار ولد جنگیان کو بھی حراست میں لیا، جس کے بعد دونوں کی کوئی اطلاع موصول نہیں ہوئی۔ بتایا جا رہا ہے کہ دونوں ایک ہی خاندان سے ہیں۔
دوسری جانب، 4 جون کو پاکستانی فورسز نے آواران کے علاقے جھاؤ کورک سے مختیار ولد اشرف کو حراست میں لینے کے بعد جبری لاپتہ کر دیا جن کا تاحال کچھ پتہ نہیں چل سکا ہے۔
چار روز قبل، پاکستانی فورسز نے ٹھیکیدار بشیر احمد ولد حسن کو اُس وقت حراست میں لیا جب وہ لسبیلہ سے جھاؤ کی جانب جا رہے تھے۔ بشیر احمد کا تعلق جھاؤ کے علاقے گزی حسن گوٹھ سے ہے۔
اسی طرح، گزشتہ رات تین بجے پاکستانی فورسز اور خفیہ اداروں کے اہلکاروں نے ناگ میں ایک گھر پر چھاپہ مارا اور زراق نامی نوجوان کو حراست میں لینے کے بعد جبری طور پر لاپتہ کر دیا۔
