شکارپور کے نیو فوجداری تھانے کی حدود میں لاڑکانہ بائی پاس کے قریب واقع ٹول پلازہ کے مقام پر آج دوپہر کو مسلح افراد کی جانب سے گاڑی پر فائرنگ کی گئی، جس کے نتیجے میں چار افراد موقع پر ہی ہلاک ہو گئے۔
پولیس کے مطابق ہلاک افراد کی شناخت نور محمد سندرانی، نبام الدین سندرانی، مٹھل سندرانی اور کار ڈرائیور رسول بخش معرفانی کے طور پر ہوئی ہے۔ واقعہ اس وقت پیش آیا جب مقتولین عدالت میں حاضری کے بعد اپنے گاؤں واپس جا رہے تھے۔
پولیس کا کہنا ہے کہ واقعہ سندرانی اور بروہی برادریوں کے درمیان دیرینہ دشمنی کا شاخسانہ ہے۔ واقعے کے بعد شکارپور پولیس کی بھاری نفری موقع پر پہنچ گئی۔
ڈی آئی جی لاڑکانہ ناصر آفتاب پٹھان نے واقعے کا نوٹس لیتے ہوئے ایس ایس پی شکارپور سے فوری رپورٹ طلب کر لی ہے۔ہلاک افراد کی لاشوں کو پوسٹ مارٹم کے لیے اسپتال منتقل کر دیا گیا ہے، جبکہ واقعے میں ملوث ملزمان کی گرفتاری تاحال نہیں ہوسکی ہے۔
