لاپتہ غنی بلوچ کی ہمشیرہ بی بی سلطانہ نے کہا کہ میرے بھائی کو کوئٹہ سے کراچی جاتے ہوئے خضدار کے مقام پر جبری طور پر لاپتہ کیا گیا، جس کے باعث اہلِ خانہ شدید پریشانی اور ذہنی کوفت کا شکار ہیں۔ ہم تمام ریاستی اداروں اور عدلیہ سے مطالبہ کرتے ہیں کہ غنی بلوچ کو منظرِ عام پر لایا جائے، بصورت دیگر ہم آئندہ کا لائحہ عمل طے کر کے راست اقدام اٹھانے پر مجبور ہوں گے، جس کی تمام تر ذمہ داری حکومت اور انتظامیہ پر عائد ہوگی۔
ان خیالات کا اظہار انہوں نے بدھ کو کوئٹہ پریس کلب میں ایک پریس کانفرنس کے دوران کیا، اس موقع پر دیگر افراد بھی موجود تھے۔ انہوں نے کہا کہ غنی بلوچ 25 مئی کو کوئٹہ سے کراچی جا رہے تھے جب خضدار کے مقام پر سیکیورٹی اداروں کے اہلکاروں نے انہیں جبری طور پر لاپتہ کیا۔ غنی بلوچ علم دوست اور کتابوں سے لگاؤ رکھنے والے فرد تھے، جو “زوار” نامی پبلشنگ ہاؤس کی بنیاد رکھ کر کتابوں کی اشاعت کے سلسلے میں کراچی جا رہے تھے۔
انہوں نے کہا کہ غنی بلوچ کے ضعیف والدین ہیں، جس کے باعث اہلِ خانہ کو شدید ذہنی اذیت اور پریشانی کا سامنا ہے۔ ہم سیکیورٹی اداروں کے حکام اور حکومت سے مطالبہ کرتے ہیں کہ غنی بلوچ کو منظرِ عام پر لا کر انصاف کے تقاضے پورے کیے جائیں۔ بصورت دیگر ہم 48 گھنٹوں کا الٹی میٹم دیتے ہیں کہ انہیں منظرِ عام پر لایا جائے، بصورت دیگر آئندہ کا لائحہ عمل طے کر کے راست اقدام اٹھائیں گے، جس کی تمام تر ذمہ داری حکومت اور سیکیورٹی اداروں پر عائد ہوگی۔
