بلوچستان کے ضلع واشک کے علاقے سکن میں پاکستانی فورسز کی بڑی تعداد میں آمد سے ایک بار پھر ممکنہ فوجی جارحیت کا خدشہ ہے۔
مقامی ذرائع کے مطابق کچھ عرصہ قبل اس علاقے میں پاکستانی فورسز کا ایک کیمپ قائم تھا، جو بعد ازاں خالی کر دیا گیا تھا۔ تاہم اب ایک مرتبہ پھر فورسز کی موجودگی سے خدشہ ظاہر کیا جا رہا ہے کہ علاقے میں دوبارہ فوجی جارحیت کی جا سکتی ہے۔
ذرائع نے بتایا کہ ماضی میں قائم کیمپ میں مقامی افراد کو جبری طور پر لاپتہ کر کے تشدد کا نشانہ بنایا جاتا رہا ہے جس کی وجہ سے موجودہ صورت حال نے عوام میں شدید خوف و ہراس پھیلا دیا ہے۔
تاحال کسی گرفتاری یا جانی نقصان کی اطلاع موصول نہیں ہوئی ہے۔
دوسری جانب بلیدہ اور پروم سے بھی فوجی جارحیت کی اطلاعات موصول ہو رہی ہیں۔ ذرائع کے مطابق پاکستانی فورسز نے پروم کے پہاڑی سلسلے میں فوجی جارحیت کا آغاز کر دیا ہے جبکہ بلیدہ سے بڑی تعداد میں فورسز کے اہلکار پہاڑی علاقوں میں داخل ہو چکے ہیں۔
مذکورہ پہاڑی علاقہ ضلع کیچ اور پنجگور کے درمیان میں واقع ہے، جہاں مقامی افراد نے فورسز کی زمینی نقل و حرکت کی تصدیق کی ہے۔
