بلوچستان کے مختلف اضلاع میں پیش آنے والے پرتشدد واقعات کے دوران فائرنگ اور آتشزدگی کے سانحات میں مجموعی طور پر چار افراد جاں بحق جبکہ متعدد زخمی ہوئے۔
خضدار کے علاقے لزو بند میں نامعلوم مسلح افراد کی فائرنگ سے ایک شخص ہلاک ہوگیا، پولیس کے مطابق مقتول کی شناخت عنایت اللہ ولد رحیم کے نام سے ہوئی ہے جو گدر کا رہائشی تھا۔ پولیس نے لاش کو تحویل میں لے کر ضابطے کی کارروائی کے لیے اسپتال منتقل کر دیا ہے۔ واقعے کے محرقات معلوم نہیں ہو سکی۔
دوسری جانب ڈیرہ اللہ یار کے علاقے قیدی شاخ میرحسن ڈپ کے مقام پر رند اور جھکرانی برادری کے درمیان زمین کے تنازع پر فائرنگ کے نتیجے میں فائق علی رند اور غلام محمد رند زخمی ہو گئے۔ پولیس نے زخمیوں کو قریبی اسپتال منتقل کر دیا ہے۔
ڈیرہ اللہ یار ہی کے علاقے محب علی لاڑو میں نامعلوم افراد نے ایک رکشے پر سوار غوث بخش ابڑو نامی شخص کو گولیاں مار کر قتل کر دیا۔ پولیس کے مطابق واقعے کی ممکنہ وجہ رشتے کا تنازع ہے۔
ادھر سانحہ نوشکی میں ایک اور زخمی دم توڑ گیا ہے، جس کے بعد جاں بحق افراد کی تعداد چار ہو گئی ہے۔ جاں بحق ہونے والے کی شناخت فائر بریگیڈ اہلکار عبدالرازق ولد عبدالمجید کے نام سے ہوئی ہے، جو دورانِ علاج زخموں کی تاب نہ لاتے ہوئے چل بسے۔
سانحے میں 70 کے قریب افراد جھلس کر زخمی ہو گئے تھے، جن کا علاج کوئٹہ اور کراچی کے اسپتالوں میں جاری ہے۔
واقعے کے بعد پورے نوشکی شہر میں فضا سوگوار ہے۔
