کیچ: 16 دسمبر 2024 کو جبری طور پر لاپتہ ہونے والے زمان جان ولد سفیان اور عبدالحسن ولد رحمت کے اہل خانہ دو دن سے سی پیک روڈ پر ان کی جبری گمشدگی کے خلاف احتجاج پر سی پیک روڈ پر بیٹھے ہیں۔ اہل خانہ نے احتجاجی ریلی بھی نکالی گئی، جبکہ احتجاج میں لوگوں کی بڑی تعداد بیٹھی ہوئی ہے۔
مظاہرین کا کہنا تھا کہ ان کے بچوں کو مقامی چیئرمین ہوتمان نے اپنے ساتھ لے کر ریاستی خفیہ اداروں کے حوالے کر دیا ہے۔ ان کی جبری گمشدگی کو نو دن ہوچکے ہیں اور تاحال ان کی کوئی خبر نہیں ہے۔ ہمیں ہر روز کہا جاتا ہے کہ آپ کے بچے آج یا کل رہا ہو جائیں گے لیکن ہمارے بچوں کی رہائی کے لیے کوئی قدم نہیں اٹھایا گیا۔
مظاہرین کا کہنا ہے کہ آج ہم دو دن سے احتجاج پر بیٹھے ہیں جبکہ گزشتہ رات یہاں انتظامیہ نے آکر کہا کہ ہمارے بچوں کو دو دن میں رہا کر دیا جائے گا۔ ہم نے انتظامیہ سے کہا ہے کہ ہمیں خط لکھیں کہ ہمارے بچوں کو دو دن میں رہا کیا جائے، انتظامیہ نے کوئی خط نہیں لکھا اور کہا ہے کہ آپ میری بات پر بروسہ کرلیں۔
انہوں نے کہا کہ جب تک ہمارے بچوں کو رہا نہیں کیا جاتا ہم اپنا احتجاج جاری رکھیں گے۔ اگر یہاں ہماری آواز نہ سنی گئی تو ہم اسلام آباد جا کر احتجاج کریں گے۔
